屬虎嘅朋友,喺2020年屬於意順年,與朋友之間可以和順相處,兼且有粒『暗貴人』星照住,正所謂『暗貴照門,萬事順利』。故此,喺2020年各位虎仔虎女會覺得樣樣事,都容易得到朋友嘅關照。喺運勢上,比往年更加暢順,人緣情份更加好,能夠逢凶化吉,令事業上取得突破性嘅發展。
事業方面,屬虎嘅朋友喺2020年受到『地喪』同埋『喪門』凶星影響,一D表面上睇嚟係稱心滿意嘅事情,卻遭受到唔少是是非非嘅負面影響,同事間合作關係明顯比往年差,感覺背後有好大隱憂。好在有粒『暗貴人』吉星幫助,得到長輩提攜,朋友、上司及家人嘅支持,令您嘅事業運能夠向上發展,故此要全力工作,自然可以稱心滿意!
喺財運方面,屬虎嘅朋友喺2020年受到『驛馬』星影響,向外地發展嘅機會您會多咗,正是『勞碌生財』大賺異地錢財。小心顆粒『大耗』損財星嘅出現。出外工作時,易有破財的機會,小心為要呀!至於偏財投資運方面,就麻麻啦!
桃花運方面,虎仔虎女喺2020年有好大嘅變化,因『孤辰』凶星出現嘅原故,令您哋感情投入,容易出現一D情緒不安嘅問題,經常將一D小爭拗由小事化大,導致您與愛侶建立多年感情,有減退之現象;甚至因情緒上小毛病,引發成抑鬱症!
健康方面,虎仔虎女喺2020年受到『地喪』呢粒兇星嘅纏繞,您嘅身體會出現好多小毛病,導致您患大病嘅機會大大增加,要特別留意腹部同埋腸胃病。若然呢啲疾病同埋小毛病,令您真的感覺憂慮而不安的話,咁您就應該去拜吓太歲啦!
雖然屬虎嘅朋友喺2020年,似乎運勢財運反覆,阻礙重重,但並唔係冇化解方法嘅!2020年嘅旺財位喺屋嘅西北方,可以放一個紅色方形或圓形嘅木盒,盒裡面放置八隻『黃元寶』嚟招納財氣。能夠嘅話,袋埋個橫財神金牌喺身邊,話唔定有機會中埋六合彩頭獎添!記住財位保持清潔,錢財自然可以積聚啦!