區仲德博士笑談：「變臉」改運  -- 東周刊

       黃翠如近日主演的劇集《那些我愛過的人》收視和口碑俱佳，劇中她一改戲路，飾演命苦的單親媽媽，苦情喊戲令人眼前一亮。然而，網民同時察覺到她的容貎，跟之前大有分別：鼻樑變高、變直，鼻頭亦變尖，鼻子離奇逆齡二度發育，愈變愈靚！據知，跟老公蕭正楠結婚快兩年的她，早前獲得高人指點迷津，教她女人擁有一個靚鼻，既旺夫又旺生仔。故此，她重手執靚個鼻，疑似以面相催旺運勢，一心助老公事業發圍榮登視帝寶座之餘，並希望借運「造人」，求為夫家添丁繼後香燈。

　　著名玄學家區仲德博士表示，「進化個鼻」的確可以改運，尤其女性鼻為夫星，主婚姻及財運，鼻樑高、鼻哥靚，可以助旺自己及夫君運勢。區博士就黃翠如的近照，為她睇相論命：「佢個鼻，山根高而鼻直，山根肉飽滿，鼻骨微微隆起冇塌陷，鼻孔又隱蔽，係一個虎鼻型，本身係女強人，仲能夠旺夫事業有成就，有名又有利。加上，佢鼻頭光亮，鼻翼相稱，人中闊而無痣，係益子之鼻，預料佢唔使幾耐，必有男丁所出。」

「變臉」運程大拆解

　　娛樂圈不時就會傳出女星「變臉」的消息，容貎被發現隨年月不斷進化及改良；而相學上，原來對她們的運程亦有所改變。玄學家區仲德博士，分別拆解唐詩詠及鄧紫棋「變臉」前後的運程。

唐詩詠「開眼」利愛情

　　出道時一副鄰家女孩模樣的唐詩詠，近年被網民發現外貎上有很大改變。由以前單眼皮、眼矇矇，到今日雙眼皮變得更明顯，眼距亦變窄，更被網民形容她「開眼」。玄學家區仲德博士表示，眼睛變大，相學而論，事業及愛情都會更為美滿。「矇豬眼有名叫：癡視，經常畀人感覺有啲恍惚、目神昏視，令人誤解自己係一個貪婪、愚蠢嘅人，往往投資及感情運欠佳，就連觀眾緣都唔好。換咗眼大神足嘅眼睛，畀人感覺心地善良、有人情味，自信心亦大大增強，可以增加觀眾緣，若做演員做戲尤其有利，星運可望平步青雲。眼睛明亮嘅人，相學上頭腦清晰，投資精明，選擇愛侶都會眼光獨到，愛情運自然如魚得水，可以搵到如意郎君，未來日子，相信婚姻及財運都可兩得意。」

鄧紫棋「間尺鼻」旺事業

　　剛出道時的鄧紫棋，面形肥嘟嘟，配上個招牌圓鼻，樣子可愛；不過，她近日在社交網上載的靚相卻被發現，豬膽圓鼻離奇消失，鼻子變高、變直，加上鼻翼收窄，似足「間尺鼻」。玄學家區仲德博士以相論命，解釋她面容改變對運程亦會帶來影響。「鄧紫棋以前係豬膽鼻，鼻翼豐厚、圓潤，為人做事敦厚；但係自己事業及投資方面，拼搏努力都唔容易達到理想成就。依家佢個鼻變直，尺鼻可以增加投資嘅膽量；而事業方面，進取心加強，就算面對挫折都不屈不撓，做娛樂圈，會走上成功之路。」