風水命理開運專家

		報章名稱：新Monday 刊登日期：2006年01月27日文章主題：勁靈明星廟大比併

　　恭喜發財！新正頭除咗拜年，就梗係拜神啦！原來喺娛樂圈有唔少男女大小明星，都極之重視每年新年要去自己拜開間廟祈求事業順利！究竟乜明星拜乜廟？而嗰間廟最靈又係啲乜？

　　《新Monday》就喺新正頭為明星廟大起底，兼搵嚟玄學家區仲德師傅講下明星廟有咩背景有幾靈，即拜！

最靈風車轉運！車公廟
求神明星：樂基兒、郭晉安、鄭中基、方力申、吳卓羲
神靈起底：區仲德師傅：「車公廟最啱就係求偏財運嘅人嚟拜祭架喇，可以祈求嚟緊搵多啲錢。而車公廟最出名嘅就係廟入面嘅風車，入去轉一下風車，喺嚟緊新嘅1年轉會番啲好運返嚟。」

最靈借庫求財！觀音廟
求神明星：劉德華、楊千嬅、吳卓羲
神靈起底：區仲德師傅：「觀音廟所保佑嘅嘢有好多，好似大家可以借庫嚟希望增進財富；未有仔女嘅夫婦亦可祈求觀音送子；而病痛多嘅人亦可以向觀音祈求健康，每年都吸引唔唔少人去上頭灶香同借庫架！」

最靈求平安求財！天后古廟
求神明星：容祖兒、梁家輝
神靈起底：區仲德師傅：「天后廟供奉嘅天后娘娘，係以前啲漁民出海前會祈求出海平安、身體健康同埋捕獲更多漁獲。不過香港嘅漁民已經唔多，而家去拜天后娘娘嘅人多數都係為咗求平安同財運居多。」

最靈求偏財！濟公廟（百姓廟）
求神明星：李彩華、2R
神靈起底：區仲德師傅：「濟公廟入面供率嘅係濟公活佛，主要係求偏財，啱一啲有關聲色犬馬嘅行業，好似娛樂圈咁，所以好適合娛樂圈中人去祈求事業順行。另外，濟公廟亦適合一啲晚間營業場所嘅人去拜祭，可以祈求搵多啲錢。」

最靈求籤測未來！黃大仙廟
求神明星：湯盈盈、吳日言、張文慈、鄧穎芝
神靈起底：區仲德師傅：「黃大仙係來自道家嘅，最熱心就係幫助貧苦嘅黎民百姓，出名有求必應，如果係想求財運同健康嘅人，嚟呢度就最啱喇。而黃大仙最靈驗嘅就梗係黃大仙籤啦，有唔少人唔知未來點算嘅時候，都會去黃大仙求籤指點下！」

最靈斬妖除魔！文武廟
求神明星：胡兵、楊崢、周敔邦夫婦及仔仔周國豐
神靈起底：區仲德師傅：「文武廟入面供奉住文神同武神，佢哋兩位神最靈嘅就係保佑信眾嘅財運、生意同事業運，如果上年行衰運嘅人，都可以嚟呢度拜祭架。重有就係呢兩位神主要負責斬妖除魔，所以亦都可以辟邪架！」