風水命理開運專家

		報章名稱：新Monday 刊登日期：2006年01月06日文章主題：雞年召妓男星鹹樣逐個篤

　　雖然已經06年，但係而家重係雞年！

　　唉！今年娛樂圈風氣特別怪：女星就狂露胸，男嘅就被人狂偷影到去叫雞......都係講做嫖妓好啲！喺05年，大大話話都有成10位男星被人報紙雜誌偷影過喺外地嘅夜總會尋歡！

　　新一年不妨輕鬆啲，我哋一於搵嚟玄學家區仲德師傅睇下以下其中6位曾經喺外地尋歡過嘅男星，佢哋嗰樣究竟有幾鹹濕，究竟肯唔肯花錢喺女人身上先！

靚鬼仔　北京擒17歲北妹
　　玄學家區仲德師傅表示：「呢個男星嘅山根（鼻嘅起點）高而闊大，代表咗佢嘅子女根，照睇佢嘅要求好旺盛，鼻大而闊亦代表咗佢嘅能力（性方面）唔錯，加上佢嘅下唇厚，慾念都幾強；而佢嘅子女宮有紋，喺男女間感情上容易失控，但上唇薄，好有機會發生一夜情，對於女人唔太投入，亦唔會用好多錢喺女人身上。」
鹹濕指數：★★★★　豪爽指數：★★　（以5★為最激）

亞記賢　尋歡食消夜
　　玄學家區仲德師傅表示：「佢嘅鼻長，而鼻愈長亦即係性能力（性方面）愈強，佢嘅嘴角比較鬆同下垂，所以對感情同慾念都控制得冇咁好，加上佢下巴長，對女人都放得幾多感情，佢命格嘅紅艷星多，即係代表男性桃花多，所以好注重女色，可以叫做冇女人唔得啦，佢個鼻睇到鼻窿，所以都幾肯使錢喺女人身上。」
鹹濕指數：★★★★★　豪爽指數：★★★★

實力娘　勁鹹濕33B上海妹
　　玄學家區仲德師傅表示：「佢嘅子女宮飽滿，鼻大而短，感情放縱，但對感情唔長久。佢嘅下巴尖，下巴代表水，愈尖就對情慾要求愈多，同埋桃花都會多，但個口合埋嗰陣唔係太緊，正所謂口開漏財，所以都幾肯用錢喺女人身上，如果有報道話佢真係出埠尋歡唔出奇架，佢都幾易被女人呃到錢架！」
鹹濕指數：★★★　豪爽指數：★★★★

跑車霖　泰國浴花笑佢快
　　玄學家區仲德師傅表示：「佢呢個樣真係唔似去滾喎，佢個女朋友唔係好似好惡嘅咩？哈哈！點解唔似？佢嘅鼻唔大，感情唔放縱，唔會咁易投入（女人身上），加上佢嘅嘴唇合埋嗰陣好緊，喺感情同慾念上處理得好，真係被人偷影到佢去尋歡？我睇佢真係唔似去滾喎，係咪啲人寫到佢咁咋？」

鹹濕指數：★★　豪爽指數：★★

傻爆強　搞笑氹上海北姑
　　玄學家區仲德師傅表示：「佢嘅鼻大，桃花重，女人多，下唇厚亦代表慾念強，加上佢有眼肚，所以要亦都多。佢條眉淡，為人都都應該幾好色同埋鍾意女色。佢嘅鼻見吾到鼻窿，所以用錢方面比較謹慎，對夜場女唔會勁俾貼士，所以用喺女人嘅錢一般，都係應使得使，唔會好多，適中咁啦，未去到好孤寒嗰種嘅！」
鹹濕指數：★★★★☆　豪爽指數：★★☆

雞蟲華　北京大戰1拖3
　　玄學家區仲德師傅表示：「佢呢對眼叫做『魚眼』，佢嘅鼻都大，色慾強，加上佢嘅耳珠大而下垂，即係個人色心重，難怪被人影佢1拖3。同埋佢塊面白，好似『白面書生」咁，所以桃花重，重好多女人黐身添，佢嘅上、下唇厚度適中，所以用錢時都冇乜點諗，佢呢個相真係被女人呃錢都得呀，哈哈！」
鹹濕指數：★★★★★　豪爽指數：★★★★★