風水命理開運專家

		報章名稱：東方新地刊登日期：2004年01月07日文章主題：痣靈玄機有樣睇

　　區仲德師傅表示，正所謂「面無好痣」的而且確，對於貪靚嘅人嚟講，無端端多粒痣，始終有礙觀瞻，喺相學上，亦係壞多於好。痣分為兩種，如果色澤紅潤似有生機，則為好痣；反之呈深啡色、黑色等，基本上都唔慌好嘢，而分布喺唔同位置，亦代表唔同嘅影響。

耳：耳殼外圍及耳骨位置有痣，代表聰明，出身好，且勤奮努力，必有成就。耳珠有痣，為富貴之格，為人孝順聽話。
代表：蔡卓妍

額：印堂（兩眉之間）有赤痣，屬貴格之人，成世好運；相反如黑痣，則運程受阻，頭頭碰著黑。而額上其他位置有痣，則絕非好事，極可能剋住父母。
代表：薜家燕

鼻：鼻樑上有痣，一生運程阻滯，多災多難，尤其對財運影響最大；如果生正鼻頭，更易有刀傷之災，仲會剋住另一半及子女。如人中有痣，代表異性緣旺盛，不過嚟親無好嘢，而且中年後更會剋住子女。
代表：祥嫂

唇：痣喺正唇內，小心口舌之災，如喺唇角（八婆墨），則更加是非纏身。如果生喺嘴嘅周圍，財來財去，搵到剩唔到。如困喺嘴下凹位，則是好酒好色之人，小心酒色累事。
代表：羅嘉良

下巴：下巴有痣，無乜機會置業，晚年景況麻麻；如生喺下巴左右，成日為工作煩惱，且易犯水險。
代表：張燊悅

眉：眉毛內有痣，稱「禾稈蓋珍珠」，代表富貴長壽，左眉主財、右眉主壽。相反生於眉毛下、雙目對上的黑痣，則一生困窮，隨時餓死老婆瘟臭屋。
代表：張栢芝

眼：如在眼白內有痣，非好即盜，易惹官非。眼尾有痣，則常與賊為朋，易受牽連。如生在眼下，常稱「淚痣」，成世人愁苦孤寂，晚年尤其多病。
代表：何超瓊

顴：顴骨位生痣，權力受制，成世俾人騎住，而且財運反覆，左手嚟右手去。
代表：陳慧琳

頸：頸上有痣，大富大貴格，而且容易握權在手。如喉骨位置有痣，更加係貴人格，成世夠運，衣食無憂。
代表：陳冠希