風水命理開運專家

>> 香港商報 >> 轉風車早出門　7-11點好時辰 >> 轉風車早出門　7-11點好時辰

		報章名稱：蘋果日報刊登日期：2011年2月5日文章主題：轉風車早出門　　　　　 7-11點好時辰

出發前準備　最遲早上九時到埗

　　每年一到年初三呢個大日子，好多善信都會誠心拜車公，祈求保佑事業、愛情、健康都得意，希望新一年順順利利，總之就想嗰樣得嗰樣啦！不過大圍車公廟今日肯定人頭湧湧逼得水洩不通，警察更會封路實施人流管制，所以出發拜車公前一定要做足準備工夫，排排吓隊先發覺買漏嘢就真係有排搞。今次搵來風水玄學顧問區仲德博士教路，逐個步驟一一講你知，千祈唔好嫌我哋長氣，因為好多煩瑣事你會知但未必記得，跟住下面步驟做，就包你拜得順風順水，唔使行寃枉路啦！

1. 最佳時辰　早7至11

　　今年拜車公的吉時係2011年2月5日（年初三）早上5時至下午1時，而最佳的時辰為上午7時至11時，以上香時間為準。所以大家記住要早啲起身買拜神祭品，因為排隊入場逼到埋香爐邊上香起碼預多1個鐘，預鬆少少，朝早9點鐘好去到車公廟排隊喇！

2. 車公衣寶

　　拜車公的首要準備當然係一份車公衣寶，當中最好包括車公衣、百貴人、長祿貴人、富貴袋及百解等，當然唔少得三支大香及一紮細香。想方便快捷，可以入到廟先買，不過就已經一套套執好晒，價錢由$30至$3,288一份不等。想講究齊全，可以自行去香燭店買車公衣寶之餘，又可以彈性啲買埋你的心水祭品，好似加多一份元寶添多一份誠意。想車公再清楚啲你想求乜，更可以另外買多一份衣寶一齊拜，求學業買文昌衣寶、求財運買財神衣寶、求健康就買平安衣寶。至於買咩價錢的衣寶，區師傅就話隨心，有能力的話，當然越大越好啦！

3. 車公愛燒肉

　　想再有誠意啲，可以準備食物作祭品。唔少人都鍾意用齋菜拜神，但區師傅話車公唔食素，忌羊肉，鍾意食燒肉，而按照傳統就會以三牲（即豬、雞及魚）、四果（即蘋果、橙、提子及蕉）、祭酒及糖果拜祭。為免今日廟內人太多無位放祭品，可以簡化啲，買一份燒肉及些少生果經已足夠。

4. 指南針尋方位

　　記住帶定筆及指南針，筆當然用來寫名落車公衣寶，入到去逼成咁，問人借都幾煩。至於指南針就係方便搵方位，因為求唔同心願最好向住適當嘅方位拜，有iPhone當然方便得多，因為電話內置指南針Appso架！

拜神有序　順轉風車求順風

　　準備妥當，好行快兩步出發拜車公，下一步當然係認清拜神步驟，咁即使排隊等耐咗，都無咁容易自亂陣腳影響上香時間啦，唔信？好多人見到點香區排晒長龍，就心急拿拿臨跑去點香，其實入廟第一步係買風車，上香時可以順手拎風車吸靈氣，如果唔記得，又要逼埋香爐多一次，都咪話唔頭痛。

第一步：入廟買風車

　　入到車公廟，門口左邊有得買風車，記住買定風車，方便埋到香爐邊拎風車吸靈氣。風車款式跟往年大致一樣，至於價格就有輕微通脹，貴價大風車的價錢不變，但最細尺碼的風車仔就由舊年$20加至$25，最貴的風車有成個人咁高，就要$888。

第二步：洗手表尊重

　　好多人都唔記得呢一步，洗手上香代表一份尊重。你平日開飯前都會洗手啦，何況裝飯畀神食？

第三步：寫清姓名求甚麼

　　點香前，要將車公衣寶準備好，最好將叠衣紙一張張分開再叠高，最重要係喺一張黃色百解衣上面寫清楚姓名、出生日期及住所地址，等車公知道你係邊個。如果已經有清晰目標想求乜，不妨可以寫埋上去。

第四步：點香區點香

　　為安全起見，廟內唔可以自行生火點香，所以廟兩旁都設有點香區，一大班工作人員會幫手點香，火爐火力亦夠晒猛，超快手。點香區放了一本名冊，工作人員會問你添唔添香油，大家可隨心意。

第五步：上香留三支

　　點完香可去正殿前面的香爐區上香，記住先上三支大香。呢個時候用指南針搵清楚方便位，將三支香放於額前的正中位置拜三下。若然求姻緣，可向西南方拜；求事業，可向東北方；求財運，可向正東方。拜時要向車公稟明姓甚名誰、出生日期同埋今年想求咩。上大香時，想再正宗啲，可以先插一支中間，再插一支右邊，最後插左邊。再於其他細香爐各上三支細香，記住留番三支細香帶入正殿。

第六步：風車吸靈氣

　　上完香，可以順手拎個風車喺香火上面順時針轉三個圈，幫助消除雜氣同吸收靈氣，帶返屋企庇佑時就更靈驗。

第七步：先轉風車後打鼓

　　最後的指定動作當然係轉風車、打天鼓。區師傅話要先轉風車催運，後打天鼓報到。坊間傳言話往年好運就順時針轉，往年行衰運就逆時針轉，大家記住唔好信呀！區師傅：「轉風車係要用右手向順時針方向轉，一下就夠。寓意祈求新一年順境，好運順勢而來，無人逆時針轉。」

第八步：化寶求籤大功告成

　　家基於安全同環保，好多廟宇都已經無火爐俾善信化寶，車公廟亦唔例外。不過廟內放置咗好多聚寶車，只要將車公衣寶放落去，職員便會幫你化寶。想安心啲，可以帶返屋企自己化都得，但記住小心火種呀！若有煩惱問車公，可以求籤解困。想求籤就要準備$20按金去解籤處借籤筒，求完就以$5取一張籤紙，想搵師傅解得清楚啲，就準備多$10解籤。

禁忌貼士提提你

　　國有國法，家有家規，原來廟宇都有唔少禮儀禁忌，家就提醒大家有乜要注意、有乜需要遵守。

忌穿綠衣

　　根據今年的流年運程計算，今年兔年屬金木年，綠色最弱，所以區師傅話：「着紅、黃、藍及黑色衫拜神都適宜，最好避免着綠色衫，會令自己運勢減弱。」

風車家中放正位

　　攞拜過神的風車返屋企，當然唔可以亂放，想全年順風得勢，更加要放啱位，區師傅話：「求姻緣，風車可放東北位；求事業，則放西南位；求財運的話，就放西北方。」

大圍站出較順路

　　今日去車公廟最快捷方便就梗係搭港鐵啦，自從多咗條馬鞍山線之後，就多咗個車公廟站，唔好以為車公廟站一出就係車公廟，其實廟位置係介乎兩站中間，由大圍B站出口行過去較順路，大約5至10分鐘。不過相信依然會有人唔揸車唔安樂，最近的停車場係對面新翠邨停車場，每小時$13，不過就可能要早多1個鐘去排隊等位。

衣着言行得宜

　　入到廟唔可以講粗口顧及言行，打扮亦要得宜，特別女士們應盡量避免着短裙或低胸衫，萬一走光對神明不敬之餘，跪拜時都唔方便。入大殿拜神時唔除帽表示對神不尊敬，所以避免戴帽。

剛生完BB免進

　　正戴孝或辦理喪事一百日內的人及剛生完BB一個月內的媽媽們都唔好入廟。

記得還神

　　同車公許下心願，必須畀車公一個回報。還神時準備所需的衣寶，上面必須放一對還神花，表示酬謝神明全年護蔭。

塔香多一份庇佑

　　好多善信拜神之外，都會點一個塔香求多一份庇佑，點一星期收費$120，點一個月收費$380。

紀念品多花款

　　即使家人朋友無一齊去拜車公，好多人都想將呢份平安帶畀身邊人，廟內有好多紀念品選擇，大家睇睇有無合適心水。