風水命理開運專家

		報章名稱：蘋果日報刊登日期：2008年2月6日文章主題：頭炷香馬虎打孖上

　　今晚食完團年飯，凍到連年宵都唔想行，但再凍總有一件事要做，就係上頭炷香！相傳年初一乃天門大開之時，上頭炷香就係為第一個向神明請願，神明對上頭炷香者最有印象，自然最眷顧此人。特別係豬年股市上上落落弄得市民心情七上八下，踏入鼠年玄學師區仲德教路，求財記緊着紅底入黃大仙對正西方上香；肖馬者則無懼「馬馬虎虎」起行。

黃大仙似華佗人人都幫

　　天寒地凍煙霧熏眼，上頭炷香唔算好玩事，之但係點解個個爭崩頭都要上頭炷香呢？區師傅話上頭炷香就係為了搶運，「一年之始，一眾神明會出現助善眾，而神明對第一個上香稟神的人自然最有印象，亦最願意幫一大早上香那班人。」所謂神明最先受理的頭炷香時辰，就係年三十晚11點至年初一凌晨1點。而地點當然係眾所周知的黃大仙廟！區師傅解釋，因為黃大仙係得道仙人，對錢財不着重，不理你係有錢或窮人，只要你誠心就受理，「黃大仙就好似華佗咁，用心幫人，可以話百搭，你求財運、事業、愛情、健康都得。」

一馬不宜當先　與虎同行化解

　　雖然話越早上香越好，但今年犯太歲的五個生肖：馬、雞、羊、鼠、兔就要特別留意，特別屬馬者與今晚11時（子時）相，最好過了凌晨1時後才上香，不用一馬當先！肖鼠肖馬可謂水火相沖，不宜結伴上香，但若能與肖虎朋友同路則可化解。區師傅再提提大家，最緊要計埋自己寒命（生於冬天）還是燥命（生於夏天），寒命者宜穿暖色衫如紅、紫；燥命者則穿土色衫如黃、啡等。顏色上頭炷香，自然旺上加旺！

123GetReady！

　　着好靚衫搵朋友，當然要記得準備上頭炷香必備祭品，依足規矩才更顯誠意！

　　1. 生果5個及燒肉或燒豬。

　　2. 黃大仙祈福用元寶。

　　3. 大香3支上主壇用。大細定義，在於上主壇的香，不可比上其他壇的細。

上香Do & Don't

　　■先捐$20入錢箱做善事，成年都好運。

　　■入廟記住左腳先入，一路講住好說話。

　　■帶備祭品，上香時誠心念所求。

　　■上完香，買個風車回去順風順水！

　　■入到廟千萬不要撕破任何東西！「一年之始每人都求增進不宜破壞，破壞會影響太歲心情，分分鐘成年唔幫你！」

　　■女士亦唔好貪得意入廟剪甲，因同屬破壞！男女都忌說髒話。

求財向西着紅底

　　香港地人人想發達，豬年股市忽上忽落，想鼠年翻身，區師傅教路：年三十晚上頭炷香欲求旺財運，最緊要向正西財神位拜（方位天天轉，上述為今晚子時方位），再着條紅底褲，唔係邪住邪住，而係旺上加旺，「今年土水年缺火，穿紅色自然當旺，更易招喚太歲幫忙。」另外求財者以沉香上頭炷香就更好，「沉香物罕而貴，以難得之香求珍貴之財，最能討神明心。」若有其他所求者，該拜何方位，用甚麼香祭，師傅再醒你以下簡表。

　　■在黃大仙正殿上過香，可在旁邊孔道廟求埋子女學業。

香唔使大　家要靠近

　　區師傅話跟唔跟足全部上香步驟要睇緣份，「完成晒自然最好，但若然做到五成已好好！」現代人對電腦多過上一輩，學上香儀式時不禁衍生頭炷香之謎，好，就等區師傅解開呢個謎！

Q1：上頭炷香係咪越大支越好？

A1：其實上香最緊要誠心，太大支香神明都未必有足夠時間享用晒。只要有誠意，細支唔緊要，反而時間就要早少少。不過香的大小，都有暗示你誠意大小之意。

Q2：如果今晚去唔切黃大仙，在屋企上頭炷香有用嗎？

A2：若不能往黃大仙，在家最好向住黃大仙廟的方位上香以示尊敬！不過黃大仙助人，自然越在鄰近越易受助。

旺上加旺催旺物

　　上頭炷香都係為加強個人運氣，區師傅就建議大家上香時添佩紅色為主的飾物，理由跟紅底一樣，在土水缺火一年，以紅色催旺。而今年屬馬、雞、羊、鼠、兔者犯太歲，記得要掛個太歲牌，燒埋道太歲符化解！最後，上完香更可去行年宵買不同的花，放在不同方位，咁鼠年必能大吉大利。

配飾

　　■紅底外戴財神吊墜亦旺財。

　　■佩戴淺紅的龍形或猴形首飾可添運。

　　

花

　　■買棵水仙或桃花放於中宮位旺桃花或人緣。

　　■想賺幾桶金？記住買8枝蟹爪菊放家中正東位旺財！

求學業事業　首選上環文武廟

　　■上頭炷香外，將個人所求、名字、時辰八字寫在紅紙上，再掛上香塔內的守火香，就更能達成願望。

　　區師傅話黃大仙求甚麼也受理，不過若大家特別想求事業，或子女讀書不理想，就可以去文武廟轉轉運。

　　文武廟供奉文昌帝及關帝，兩位傳奇人物得道成仙後主理人間文事武功，即現在所講的事業學業，所以有此求的朋友上文武廟就晒！而香港、九龍、新界都有文廟武，區師傅就建議大家去上環文武廟，因為人氣較旺。再提提大家入廟前記住敲響廟前大鼓，告知文武二帝你到此拜祭，通傳一聲，文武二帝幫都幫你先。幫細路求學業當然更要帶備芹菜及，取其勤力聰明之意，小朋友學業自然進步。

轉運更可求人緣　必到車公廟
　　車公廟唔係初三先去咩？上頭炷香關車公廟咩事？

　　車公廟供奉的是宋朝的車大元帥，當年村落發生瘟疫，村民相信已逝的車元帥法力高強，便供奉他以求解困，結果瘟疫消失。所以往車公廟拜祭有轉運意思。不過區師傅話，車公廟亦會助求姻緣之人，「特別係感情不好、人事爭執多的人，最適宜去車公廟上頭炷香。」至於上香祭品，與拜祭黃大仙差不多，唯一不同係上香記住轉埋四葉銅風車，再買個風車回家。

　　■豬年姻緣濕滯，最好去車公廟上頭炷香，逆轉姻緣運。

　　■風車要轉得，衰運才會驅得散。轉風車要左轉3次，然後右轉3次。