風水命理開運專家

		報章名稱：太陽報刊登日期：2011年2月9日文章主題：全方位化煞　　　　　兔年好健康

　　係人都想兔年升職、加薪、發大達！不過喺個荷包賺到盆滿缽滿嘅同時，都要注意健康。唔想財多身子弱？今次就請嚟玄學家區仲德博士，幫大家解說十二生肖喺兔年嘅健康運，同時仲醒大家趨吉避凶嘅小貼士添！

兔：事事小心
　　今年因為受凶星「血刃」嘅影響，易有損傷、血光之災，事事小心為上。

化解方法
　　少啲去人多嘅公眾地方，留意車船之險，可透過捐血、洗牙以作化解。可在居室東方放一個化災葫蘆！

龍：輕微損傷
　　由於有「捲舌」及「劫煞」兩粒凶星入侵，所以特別容易有小損傷，例如擦損手腳、輕微燙傷。

化解方法
　　今年病符星位喺正南方，可以喺南面放置五帝錢同一個銅葫蘆，或者放個「化病金牌」。

蛇：注意長者
　　「吊客」凶星入侵，老人家嘅健康容易出毛病，可能有喪事、意外等發生。

化解方法
　　避免探病同問喪，最好喺西北方放置紅色、紫色方形或圓形嘅陶瓷盒、木盒或金色盒，並喺盒內擺放8粒黃元寶作為聚寶箱，以招納財氣。

馬：小毛病多
　　今年係刑太歲年，運程較反覆，加上「病符」星纏擾，身體好多小毛病。

化解方法
　　今年是非星喺正北方，可在此方位作紅色布置，最好擺個化是非葫蘆或掛紅色燈籠，並綁上9條紅絲帶，燃點9支紅蠟燭趨吉避凶！

羊：車船之險
　　肖羊人士因受「劍鋒」凶星攻擊，要特別小心血刃之災，尤其易受金屬所傷，同埋車船之險。

化解方法
　　貴氣夠，身體自然健康，可在家居東南方擺6隻黃玉元寶，或放一條銅金龍以增加權貴。

猴：心血氣疾
　　「絞煞」凶星入侵，要留意心血氣疾等痛症。

化解方法
　　人旺自然身壯，可以擇個吉日喺西北位放一個聚寶箱，箱內擺8個黃元寶加黃水晶，好好收藏，旺氣自然來。

雞：金屬所傷
　　凶星「劍鋒」發作，要留意長輩健康，而自己則易被金屬所傷，又犯車船之險。

化解方法
　　忌於正東方修造，可掛一套以金線編成嘅8枚「五帝錢」，同時擺一個有搖動形態會發聲嘅銅鐘！

狗：易生意外
　　「病符」星入侵，容易發生小意外，患病機會亦大大增加。

化解方法
　　擇一個良辰吉日，在屋企西北方放上「聚寶箱」，以收納財氣，催谷健康運。

豬：病疾纏擾
　　同樣有「劍鋒」凶星出現，小心易被金屬所傷，仲要提防疾病纏擾！

化解方法
　　今年瘟神災星於正東方，可擺銅葫蘆及8個古銅錢或者銅鐘來化解災氣。

鼠：病痛較多
　　健康因受「死符」凶星所侵，易有疾病纏擾，今年嘅病痛會多啲，大家要留意。

化解方法
　　受「死符」影響，應避免探病問喪，切勿在家宅正東方裝修。

牛：小心身體
　　凶星「血刃」影響，出外要步步留神，宜少去人多嘅公眾地方。

化解方法
　　忌喺正南方擺放紅、紫、綠三色擺設，唔好種花草樹木，應在此方位放葫蘆減弱病氣。

虎：提防意外
　　由於有「天厄」、「貫索」兩粒凶星入命，既要注意健康，出門更要提防發生小意外及車船之禍！

化解方法
　　今年是非位喺正北方，可以移走該處所有綠色物品，改用紅色系列布置來化解。