風水命理開運專家

		報章名稱：新Monday 刊登日期：2006年01月20日文章主題：狠批周侯戀散硬

　　散喇散喇！伊Gi戀捱咗7年終於玩完！娛樂圈每秒鐘每日都咁精采，伊Gi散咗之後，好多八卦嘅人都會猜緊邊對圈中情侶06會玩完。所以呢，《新Monday》集合黃大仙求籤 + 玄學家區仲德師傅，推算出以下5大明星情有冇機會喺06年玩完。重有推測邊對情侶會復合、結婚，簡直八過八婆，唔睇唔得！

周侯戀下籤　性生活唔協調
玄學家區仲德師傅：
　　「屬木嘅周杰倫06年有妻星運，感情運會唔錯，不過同時桃花都多，容易識到女仔，會令女朋友唔太開心，而屬金嘅侯佩岑，今年就犯咗孤神星，感情會有變化，容易喺外地做嘢嗰陣識到男仔，喺農曆7-8月後感情會有衝擊，或者有第3者出現。」

吳L戀中吉籤　門當戶對
玄學家區仲德師傅：
　　「屬虎嘅吳彥祖今年妻星幾旺，不過農曆3月、9月會有是非騷擾，10月後感情會幾好；Lisa嘅面尖，桃花會旺，佢對眼尖，所以份人幾重感情，鼻細即係代表小器，對伴侶會多要求，不過吳彥祖都會滿足到佢嘅，所以嚟緊呢年都會keep到。」

冠君戀中籤　男方轉性姻緣到
玄學家區仲德師傅：
　　「陳冠希屬猴，今年行火土運，感情會有新轉變，農曆5-9月會多桃花，農曆9月同11月感情生活幾開心；都係屬猴嘅Rosanne，今年佢嘅夫星會沖太歲，會被外來嘅嘢影響感情，農曆9月有機會出現第3者。」

黎基戀下籤　9月玩完
玄學家區仲德師傅：
　　「屬木嘅黎明，今年會有桃花，不過就桃花帶劫，會使好多錢喺女人身上；屬猴嘅樂基兒，今年木、火較多，桃花會較上年弱，不過桃花帶財，黎明會使錢喺佢身上。佢哋同時喺農曆9月會有感情衝擊，絕對係分手嘅高危時期。」

伊Gi戀中吉籤　07復合
玄學家區仲德師傅：
　　「屬龍嘅梁詠琪，今年感情多變，佢嘅夫星被奪，加上欄干星，令感情有阻滯，而屬金嘅鄭伊健，今年有福星拱照，雖然分咗手，但喺年初嘅感情生活會幾開心，佢哋今年復合機會都幾微，最快都要等到出年先有機會。」

同場加批！06有心人
　　玄學家區仲德師傅亦根據各人出生八字批算出，將會結婚嘅Eason同克動呢兩pair。區師傅話徐濠縈係Eason嘅貴人，呢對就打風都打唔甩，而克動同盧淑儀亦都好夾，女方照顧男方盡心盡力，結婚係好事。

　　而05年賤男梁榮忠對感情控制得唔太好，易受引誘，如果再有第3者，就會分硬手喎！