風水命理開運專家

		報章名稱：忽然1周刊登日期：2003年05月23日文章主題：老闆類型多面睇

　　市道差勁，很多人為保飯碗，不惜卑躬屈膝，狂開0T甚至擦鞋拍馬屁討老闆歡心，要事半功倍，必須了解老闆類型，否則斷錯症開錯藥，飯碗丟得更快。區仲德師傅表示，從面相特徵可以略知你老闆是重情顧舊、尖酸刻薄、愛被人擦鞋抑或認真有要求。

‧須具備三項或以上特徵（下同）

重情顧舊
鼻頭有肉山根凹：做事講良心、堅忍隨和，就算炒你魷魚都會賠到足。
上下唇厚：厚得來均等兼口大平正，這個人亦是甚為放得開，情念好的人，對下屬較寬宏大量。
額高闊眉心闊：視野廣、心胸闊、大方，就算公司蝕錢都放得開。
耳大肉厚有耳珠：善良、重感情，員工做錯事肯認錯包唔會死。
臉圓：心地好、念舊，不會隨便炒僱員魷魚。

尖酸刻薄
眉濃加眼斜：主觀倔強不用講，最弊是極之衝動，一看不順眼即下殺令。
上唇薄兼口細：一句講晒，唔念情、自私。
鼻脊如刀、鼻頭少肉：即鷹鼻，這類人以利益為主，利用完你分分鐘過橋抽板。
眉稜骨拱、印堂位窄：為人小器，得罪他的話，話炒就炒，無情講。
上耳尖及冇耳珠：這些人薄情，所以朋友及伙計的助力好弱。

愛被人擦鞋
臉圓：非常要面的人，最鍾意有人經常「傍」住，突顯老闆地位。
人中短：亦是鍾意被人擦鞋，擦得多都冇所謂，愈擦愈有著數。
眼大：這類人最鍾意別人稱讚，讚乜都得，一開心就易話為，但唔好咁密，否則適得其反。
鼻頭大：這些人鍾意搵錢，對人疏爽，但同時亦愛別人擦鞋，捧他一捧，升職加薪話咁易。

認真有要求
眉尾平直：為人公正梗直，實事求是，下屬最好少說話多做事，出幾多力他心中有數，唔鍾意別人擦鞋。
鼻樑挺直：自信心強辦事認真的人，亦要求下屬辦事認真，唔鍾意只識吹噓的人。
眼有神：做事叻判斷力強，下屬做事得唔得，心中有數，講多無謂，畀心機做最實際。
人中長：這種人千祈擦不得鞋，因為疑心重，假如你落重鞋油，反而會以為你有企圖。